NEMBO YA TAIFA NA MAANA YAKE

Nembo ya Taifa ya Tanganyika (1961 – 1964) inatofautiana kidogo na nembo ya Tanzania kwa kuwa, baada ya Muungano, iliongezewa bendera ya Tanzania na alama ya jembe na shoka

Nembo ya Taifa inaonesha mwanaume na mwanamke wakiwa wameshikilia ngao iliyo kati ya pembe za ndovu zilizosimama juu ya Mlima Kilimanjaro, mlima mrefu kuliko yote Afrika.

Pembe za ndovu zinaashiria utajiri wa wanyamapori na hifadhi za Taifa.

Robo ya juu inaonesha Mwenge wa Uhuru ambao ni ishara ya kuwapa matumaini waliokata tama, heshima palipo na dharau na upendo palipo na chuki. 

Sehemu ya juu ya nembo ina rangi ya dhahabu ikiwa ishara ya madini na chini yake kuna bendera ya Tanzania. Rangi nyekundu chini ya bendera ya Taifa ni ishara ya udongo na kilimo ambacho ni uti wa mgongo wa uchumi wa Taifa. Sehemu ya chini ya nembo kuna mistari ya pundamilia iliyowakilisha mawimbi ya bahari na maziwa kwenye mipaka ya nchi pamoja na bahari inayozunguka Zanzibar kama sehemu ya Jamhuri ya Muungano. 

Juu ya alama hizi kuna mkuki, jembe na shoka kama ishara ya ulinzi  na ujenzi wa Taifa. Mwanamke na Mwanaume katika nembo hii ni ishara ya usawa wa jinsi na wamesimama juu ya mimea ya pamba na karafuu, mazao makuu ya biashara kwa Tanzania Bara na Zanzibar. “Uhuru na Umoja” yameandikwa kwenye ukanda chini kabisa ya nembo, ambao ni wito maalum wa Taifa.