WILAYA 43 KUPATIWA VYUO VYA UFUNDI

SERIKALI imepanga kujengwa vyuo vya ufundi stadi katika wilaya 43 zisizokuwa na vyuo hivyo.

Waziri wa Elimu na Mafunzo ya Ufundi, Dk. Shukuru Kawambwa, alieleza hayo bungeni jana alipokuwa akijibu swali la Mbunge wa Meatu, Meshack Opulukwa (CHADEMA), aliyetaka kujua lini serikali itajenga Chuo cha Ufundi (VETA) katika Wilaya ya Meatu.

Dk. Kawambwa alisema tayari upembuzi wa stadi zinazohitajika katika ujenzi wa vyuo hivyo umeshafanyika.

“Wilaya ya Meatu ipo katika awamu ya kwanza ambapo mpaka sasa eneo lenye ekari 50 limetengwa katika kijiji cha Mwambiti kwa ajili ya ujenzi wa chuo hicho.

“Uongozi wa Wilaya hiyo unatakiwa ukamilishe utaratibu wa kupata hatimiliki ili hatua za ujenzi zifuatwe,” alisema.

Aidha, aliwataka wananchi wa Meatu wakati taratibu za ujenzi wa chuo hicho zikiendelea watumie vyuo vya ufundi stadi wa jirani.

Alivitaja vyuo hivyo kuwa ni Vyuo vya Ufundi Stadi Mbeya, Tabora na Mwanza pamoja na Vyuo vya Maendeleo ya Wananchi Kisangwa (Bunda), Mwanva (Kahama), Malampaka (Maswa), Nzega na Sengerema.

CHANZO:TANZANIA DAIMA