WAVULANA WAPETA DARASA LA SABA

Kiwango cha ufaulu chaongezeka asilimia 19.9

Kiwango cha ufaulu matokeo ya Darasa la Saba mwaka huu kimeongezeka kwa asilimia 19.89 huku wavulana wakiwabwaga wasichana.

Kwa mujibu wa matokeo hayo, ufaulu umeongezeka kutoka asilimia 30.17 mwaka jana hadi asilimia 50.61, mwaka huu .

Akitangaza matokeo hayo juzi jijini Dar es Salaam, Kaimu Katibu Mtendaji wa Baraza la Mitihani Tanzania, Dk. Charles Msonde, alisema jumla ya watahiniwa 427,606 kati ya 844,938 waliofanya mtihani huo walipata alama zaidi ya 100 katika alama 250.

Alisema idadi hiyo ni sawa na asilimia 50.61 ambapo kati yao wavulana ni 219,379 sawa na asilimia 55.01 na wasichana ni 208,227 sawa na asilimia 46.68.

Alisema miongoni mwao wamo wenye ulemavu 476 ambapo wasichana ni 219 sawa na asilimia 46.01 na wavulana ni 257 sawa na asilimia 53.99.

UFAULU KIMASOMO

Alisema watahiniwa walifanya masomo matano ambayo ni Kiswahili, Kiingereza, Maarifa ya Jamii, Hisabati na Sayansi.

Dk. Msonde alisema takwimu zinaonyesha ufaulu katika masomo yote umepanda kwa asilimia kati ya 6.01 na 28.06 ikilinganishwa na mwaka jana.

Alisema matokeo yanaonyesha somo la Kiswahili limeongoza kwa kuwa na ufaulu wa juu kwa asilimia 69.06 na somo walilofaulu kwa kiwango cha chini zaidi ni hisabati lenye ufaulu wa asilimia 28.62.

Alisema mwaka jana somo la Kiswahili ufaulu ulikuwa ni asilimia 41 na Hisabati ni asilimia 18.74.

Aliongeza kuwa katika somo la Kiingereza ikilinganishwa na mwaka jana ufaulu umeongezeka kutoka asilimia 21.06 na kufikia 35.52 wakati somo la Maarifa ya Jamii ufaulu ulikuwa asilimia 28.61 na umefikia asilimia 53.00.

Alisema somo la Sayansi kwa mwaka jana ufaulu ulikuwa ni kwa asilimia 41.48 na mwaka huu umefikia asilimia 47.49.

WAFUTIWA WATOKEO

 
Dk. Msonde alisema jumla ya watahiniwa 13 wamefutiwa matokeo yao baada ya kubainika kufanya udanganyifu katika mtihani huo.

Alisema kati ya idadi hiyo watahiniwa watano walibainika walishawahi kufanya mtihani wa mwaka 2011/12 na wanane walikutwa na vikaratasi vya majibu.

Aliongeza kuwa, idadi hiyo ya watahiniwa waliofutiwa matokeo kwa mwaka huu ni ndogo ikilinganishwa na ya mwaka jana ambapo jumla yao ilikuwa ni 293.

Kutokana na hilo, Baraza limeipongeza Kamati za Uendeshaji Mitihani za mikoa, wilaya na walimu na wanafunzi waliofanya mitihani hiyo.

Alisema baraza limewasilisha matokeo hayo kwa mamlaka zinazohusika ili zifanye uchaguzi wa watahiniwa wa kujiunga na elimu ya sekondari.

Alisema matokeo ya uchaguzi wa watahiniwa yatatangazwa na mamlaka husika mara baada ya kazi ya uchaguzi itakapokamilika.

Alisema matokeo ya mtihani huo yatawekwa kwenye tovuti za baraza, wizarani na Chuo Kikuu cha Dar es Salaam.

Alisema ili kujiridhisha na usahihi wa zoezi la usahihishaji kwa kutumia mfumo wa kompyuta, sampuli ya karatasi 20,795 ya majibu ya watahiniwa wa shule 200 kutoka katika wilaya 48 za mikoa tisa zilisahihishwa kwa mkono.

Alitaja mikoa hiyo kuwa ni Iringa, Kagera, Shinyanga, Manyara, Njombe, Mbeya, Morogoro, Katavi na Tanga.

Alisema ulinganifu baina ya alama za watahiniwa zilizopatikana kwa kusahihishwa kwa mkono na zile zilizotokana na usahihishaji wa kompyuta ulifanyika na kubaini kuwa ule wa kompyuta ulikuwa sahihi.

"Usahihishaji wa kutumia kalamu ulibainika kuwa na makosa machache ya kibinadamu, kama kukosea kusahihisha swali kwa kufuata mwongozo wa usahihishaji na dosari ya ujumla wa alama," alisema.

Alisema kati ya sampuli ya karatasi za watahiniwa 20,795, jumla ya karatasi 249 sawa na asilimia 1.2 zilibainika kuwa na makosa.

SHULE BINAFSI

Naye, Mwenyekiti wa Chama cha Wamiliki wa Shule Binafsi, Tamongsco Taifa , Mahmoud Mringo, akitaja mchanganuo wa ufahulu wa masomo wa shule binafsi alisema Kiswahili ni asilimia 98, Kiingereza ni asilimia 99, Maarifa ya Jamii ni asilimia 86, Hisabati ni asilimia 81 na Sayansi ni asilimia 84 .  

SOURCE: NIPASHE JUMAPILI