MGOGORO WA BARABARA KIJIJI CHA MAGO NA MKANDARASI UMEISHA

  Mkandarasi kutoka kampuni ya Boimanda  Nickson Makyao akizungumza namna atakavyotekeleza makubaliano yake na kijiji

 Mwenyekiti wa kijiji cha Mago, Paulo Sanga akitoa maelezo yake

 Mkuu wa wilaya ya Makete Josephine Matiro(kushoto) akiangalia jinsi sehemu ya barabara hiyo ilivyoharibika

 Tingatinga lililozuiwa na wananchi lisiondoke

Hali ya sintofahamu iliyokuwa imetanda katika kijiji cha Mago wilayani Makete kufuatia wananchi wa kijiji hicho kuzuia kuondolewa kwa mtambo uliokuwa ukitumika kuchimba na kupakia kifusi, imemalizika kufuatia mazungumzo yaliyofanyika kijijini hapo

Mazungumzo hayo yamewahusisha Mkuu wa wilaya ya Makete mh. Josephine Matiro, mkandarasi, TANROADS mkoa wa Njombe pamoja na viongozi wa kijiji hicho cha Mago

Akizungumza kwenye kikao hicho mwenyekiti wa kijiji cha Mago Bw. Paulo Sanga amesema wakati mkandarasi huyo akichimba kifusi, walikubaliana kuwa mkandarasi huyo atatengeneza maeneo ya barabara yatakayoharibika wakati malori yakipita na kifusi pamoja na kusomba lori mbili za matofali mpaka sehemu iliyoandaliwa

Bw. Sanga amesema kilichosababisha wakauzuia mtambo huo maarufu kama tingatinga ni baada ya kuona kuwa wanakuja kuuchukua bila kutekeleza makubaliano waliyoyafanya awali, na kuongeza kuwa wanaimani angechukua vifaa vyake asingerudi kutengeneza

Mkandarasi wa kampuni ya Boimanda inayolalamikiwa aliyejitambulisha kwa jina la Nickson Makyao amesema si kweli kwamba amekataa kutekeleza makubaliano hayo, na badala yake amesema walitakiwa kuhamisha mtambo huo ili ukaendelee kufanya kazi sehemu nyingine, huku ukarabati huo ukiendelea

Bw. Makyao amesema atabeba matofali hayo kama walivyokubaliana pamoja na kukarabati maeneo yote ya barabara hiyo yaliyoharibiwa wakati wakipitisha kifusi, na kuongeza kuwa kwa sasa bado wataendelea kutoa kifusi katika kijiji hicha na kukipitisha kwenye barabara hiyo lakini kabla hawajafanya hivyo, watairekebisha na kuendelea kupitisha kifusi na endapo itaharibika tena wataikarabati sehemu walizoharibu

majibu hayo yalionesha kuleta furaha kwa wajumbe wa kikao hicho, na kuonekana na nyuso za furaha kwani ndicho walichokuwa wakitaraji kukisikiliza

Pia mkandarasi huyo ametoa rai kwa wananchi kuacha tabia ya kuzuia mitambo kwani kwa kufanya hivyo kunakwamisha shughuli za kimaendeleo hasa ya ujenzi wa barabara katika maeneo mengine hali itakayoleta usumbufu kwa wananchi wote

Naye mkuu wa wilaya ya Makete Josephine Matiro amewatoa hofu wananchi hao kuwa makubaliano hayo yatatekelezwa mapema iwezekanavyo na kuwa na imani na mkandarasi huyo kwani amekuwa akifanya kazi zake kwa uaminifu

Jana Desemba 10 wananchi hao walizuia kuchukuliwa kwa tingatinga lililokuwa likitumika kuchimba na kupakia kifusi kuondolewa kijijini hapo kwa madai kuwa makandarasi hakutekeleza makubaliano baina yake na kijiji.

Na Edwin Moshi