TATIZO LA UKOSEFU WA MAJI LILILOANZA JANA MAKETE MJINI LIMETATULIWA LEO JIONI

Wananchi wa Makete mjini, wilayani Makete mkoani Njombe, wameombwa kuwa na subira kufuatia kukosekana kwa huduma ya maji tangu jana na kusababisha usumbufu kwao huku wengine wakichota maji mtoni kwa ajili ya matumizi yao

Kauli hiyo imetolewa na Meneja wa mamlaka ya maji Makete mjini Bw. Yonas Ndomba (Pichani) wakati akizungumza na mwandishi wetu Veronica Mtauka, na kusema tatizo hilo la ukosefu wa maji limetokana na kupasuka kwa bomba la maji katika kijiji cha Ivalalila na kusababisha maji kuishia hapo na kutofika Makete mjini

Bw. Ndomba amesema kwa sasa mafundi wake wamefika eneo la tukio tangu jana na kuendelea kulitengeneza bomba hilo ambapo kwa jana walishindwa kulikamilisha lakini kwa hivi sasa wapo eneo la tukio wanaendelea na matengenezo na wanaimani kazi hiyo itamalizika leo na huduma ya maji itarejea kama kawaida kwa wateja wake

Amesema tatizo hilo limesababishwa na ubadilishaji wa mabomba ambapo anadhani wakati wakubadilisha mambomba hayo huwenda yabondwa kwa bahati mbaya na kuweka nyufa na ndiyo maana limepasuka kwa kuwa kwa sasa idara yake inaendelea kufanya marekebisho mbalimbali ili kuongeza wingi wa maji Makete mjini

"Kwa sasa kuna mabomba tunayafukua sehemu moja na kuja kuyahamishia sehemu nyingine, hivyo wakati wa ufukuaji inawezekana bomba likagongwa na kupata hitilafu na wakati wa kulifunga halionyeshi tatizo ila baada ya kupita siku kadhaa ndiyo unakuta yanapasuka kama hivi" amesema Ndomba

 

Hata hivyo kufikia jioni ya leo tatizo hilo limetatuliwa tayari na maji yameanza kupatikana katika maeneo yote ambayo yalikuwa hayapatikani tokea jana

 

Na Veronica Mtauka